వాసవి
విశ్వమెల్ల శాంతిదాంతి - విస్తరిల్లగాజేసి
వసుంధరను రక్షింపగ - వాసవాంబ కదలిరా
కుసుమశ్రేష్ఠి కుసుమాంబకు - సుకుమార సుతగబుట్టి
భాస్కరాచార్యులకడ - పరతత్త్వపు విద్యలెరిగి
దివ్యత్వము తానుబొంది - జాతికి నవతేజ మొసగి
మార్గదర్శివై నిలచిన - మహనీయవు నీ వమ్మా. //విశ్వమెల్ల //
దుష్టత్వము దుర్మార్గము - నెదిరింపగ నెంచి నీవు
సత్యాగ్రహ మాయుధముగ - చేబూని నిలచినావు
అహింసయే నా పథమని - అగ్నిలోన గలసినావు
అమరత్వము నొంది నీవు - ఆరాధ్యవైనావు. //విశ్వమెల్ల //
నీ విచ్చిన స్ఫుర్తితోడ - నడచి మహాత్మాగాంధీ
తెల్లదొరల పారద్రోలి - తెచ్చినాడు స్వాతంత్ర్యం
పొట్టిశ్రీరాములు నీ - సత్యాగ్రహ దీక్ష బూని
ఆంధ్రరాష్ట్రమానాడే - ససువులిచ్చి దెచ్చినాడు. //విశ్వమెల్ల //
అన్నిధర్మములకన్న - అహింసయే మిన్నయని
సత్యాగ్రహశక్తి నెరిగి - సమ్మతితో జీవించెడి
ఆస్తిక జనులందరిని - ఆదరింతువమ్మ నీవు
నీపదపద్మములు గొలిచి - నీరాజనమిత్తువమ్మా. //విశ్వమెల్ల //
-ooo-
search : VASAVI
